Historia i Interior di Bar
Historia 

Netto Bar Situá skuin dilanti di edifisio di Landsloterij na Breedestraat 143 Otrabanda a habri su portanan dia 18 di desèmber 1954.
E intenshon tabata pa habri e negoshi dia 15 di desèmber, esta riba dia di Statüt, pero debí na algun trabou di remodelashon ku Netto ke a hasi na e interior e apertura a tuma lugá tres dia despues.
Na desèmber 2004, a selebrá en grande 50 aña di eksistensia di Netto Bar.
Fecha ku lamentablemente e, komo fundador, no a presensiá mas komo ku apenas seis luna promé ku e fecha memorabel aki Netto a bai sosegá.


Na okashon di 50 aña di eksistensia, a desvelá un plakat na su memoria.

 

Interior

Den kasi 55 aña di eksistensia, fecha ku lo rekordá 18 di desèmber 2009, e bar a mantené su karakterístikanan di semper esta:
un sitio bon surtí ku tur klase di bibida, kaminda ta trata tur kliente di un forma kortes i korekto.
Ademas manera semper e bar a keda un sitio trankil i desente, kaminda hendenan di tur gremio i klase sosial ta topa pa kòmbersá, gosa di bon músika i disfrutá di entre otro e famoso Ròm Bèrdè.

Hendenan di tur edat i  klase sosial, tantu públiko lokal komo e turista ta sinti fo’i ora ku e yega n’e porta, ku el a yega na un lugá partikular.
E ambiente krea pa entre otro su mosaikonan úniko di siglo pasá, e mesa i stulnan ta invitá bo pa drenta i sinta.

Miéntras bo ta sinta relahá i disfrutá di kualke bibida òf skucha bo músika preferí bo ta keda impreshoná pa interior di Netto Bar.
E interior i ambiente ta hibá bo ku su hopi potrèt i flanènan di futbòl na rekuerdonan bunita.
Su murayanan a bira un galeria úniko di potrètnan impreshonante di monumentonan konservá di Kòrsou, ku ta duna Kòrsou un lugá riba ‘World Heritage List”.
Gosando di e potrètnan aki bo por disfrutá i rekordá momentunan glorioso di nos sentro di siudat.

E kantidat di bala i flanènan kologá ta rekuerdo bibu di e diferente kampionatonan mundial di futbòl.
Bo ta keda enkantá ku e potrètnan bunita di miembronan di kas real Hulandes en general pero tambe di su Ekselensia Willem Alexander, durante di su bishita na Netto Bar.

Un trazjèt ku su portanan di glas ta duna e bishitante un bista di tur e diferente bibida nan ku Netto Bar ta ofresé. Bòter nan di e famoso Ròm Bèrdè tin un lugá prominente den e trazjèt.

Tin algu pa tur gustu!
I ..............si akaso bo no por hasi un eskoho for di e bibida nan  ku tin den trazjèt, e tròshinan di koko semper tei, pa asina ofresé bo e delisioso awa di koko..

E ambiente relahante ku ta drentá bo ora bo ta  den Netto Bar i e músika den fondo tin kustumber di pone esnan presente lòs e pianan un bes ku algun baile.
Pa no papia mes di tur djabièrnè anochi, ora Netto Bar ta keda konvertí di un manera spontáneo den un pista di baile pa su bishitante nan, ku riba músika bibu ta pone un bailamentu formal.

No laga otronan konta bo!
Tuma tempu bo mes i bishitá Netto Bar i laga e ambiente partikular aki hasi bo parti di dje.
Una bes ku bo bishit’é lo bo bolbe, pa bo sinti atrobe e magia di e bar úniko aki den su kategoria.

No ta pòrnada un kompania di seguro, pero tambe un hóben kantante manera Ephrem J resientemente a skohe Netto Bar komo é lugá pa traha nan spòt pa televishon.